अध्यक्षकाे सन्देश
राष्ट्रको सर्वाङगिण विकासमा सबैभन्दा बढी योगदान रहेको होटल तथा पर्यटन क्षेत्र र यस क्षेत्र अन्तर्गत रहेका सबै प्रकारका व्यवसायलाई थप व्यवस्थित र गोलबन्द गर्दै पर्यटक मैत्रि वातावरण एवं स्तरीय व्यवसाय सञ्चालनका लागि हामीले बिभिन्न खालका तालिम, गोष्ठी, सेमिनार, अभिमुखिकरण तालिम जस्ता गतिविधीहरु सञ्चालन गर्दै आईरहेका छौँ । साथै हामी आन्तरिक तथा बाह्य पर्यटकहरुलाई सेवा सुविधा पुर्याउँदै व्यवसायीहरुलाई विभिन्न तालिमका कार्यक्रमहरु संञ्चालन गदै आर्थिक सम्बृद्धि तर्फ अगाडि बढिरहेका छौँ । आफ्नो प्रदेशभित्र छरिएर रहेका व्यवसायीहरुलाई एकिकृत गर्दै थप सुदृढ बनाउनुका साथै स्तरीय व्यवसायका माध्यमबाट स्तरीय सेवा प्रदान गर्दै पाहुनाहरुलाई सन्तुष्ट पार्न एवं नेपालको पर्यटन क्षेत्रमा विशेष योगदान पुर्याउने उद्देश्यले होटल तथा पर्यटन व्यवसायी संघ नेपाल, बागमति प्रदेश निरन्तर सक्रिय रहेको छ तापनि देश विकासको मूल आधार बनेको नेपालको पर्यटन क्षेत्रको विकास र सम्वर्द्धनमा भने राज्य चुकेको अवस्था छ । पर्यटनको मूल आधारको रुपमा रहेको होटल व्यवसाय पूर्ण रुपमा धारासायी भयो भने यसले सिंगो देशको अर्थतन्त्रमा नै दीर्घकालिन रुपमा नकारात्मक असर पार्ने कुरा निश्चित प्रायः छ ।
देशको अर्थतन्त्रमा ठूलो टेवा पुर्याएका महासंघमा आवद्ध करिब ८० हजार भन्दा बढी होटल व्यवसायीहरुलाई उपेक्षा गर्नु राज्यको तर्फबाट ठूलो भुल हो । त्यसका बाबजुद पनि हामी अझै सरकारको ध्यानाकर्षण गराउन चाहन्छौँ र वर्तमान संकटले सबैभन्दा बढी प्रभावित बनेको पर्यटन उद्योग र त्यस अन्तर्गत पनि बिशेष रुपमा प्रभावित होटल व्यवसायलाई बचाईराख्नका लागि राज्यले विशेष पहलकदमी चालोस् र सोही अनुसारका नीति नियमहरु प्रतिपादन गरी पर्यटन मैत्रि वातावरण सिर्जना गरोस् भन्ने हामी चाहन्छौँ ।
धन्यवाद ।
दामोदर नेपाल
अध्यक्ष
Recent Post
काठमाडौं । पर्यटन क्षेत्रलाई थप व्यवस्थित, गुणस्तरीय र वातावरणमैत्री बनाउन होटल वर्गीकरणसम्बन्धी विद्यमान मापदण्ड संशोधन गर्न सरकार अग्रसर भएको छ।
पर्यटन विभागले ‘होटल, रिसोर्ट, पर्यटक इन, लज, मोटेल तथा बेड एण्ड ब्रेकफास्ट’हरुको होटल वर्गीकरण मापदण्ड, २०७६ (संशोधन २०७७ सहित) लाई समयानुकूल परिमार्जन गर्ने तयारी गरेको छ ।
विभागका अनुसार बढ्दो वातावरणीय सचेतना र दिगो विकासको आवश्यकता अनुरूप ‘ग्रीन हस्पिटालिटी’अवधारणालाई समेटेर नयाँ मापदण्ड तर्जुमा गर्न लागिएको हो ।
यसका लागि सरोकारवालाहरू—विज्ञ, व्यवसायी, प्राज्ञिक वर्ग, सञ्चारकर्मी तथा पर्यटन क्षेत्रका सबै पक्षबाट राय तथा सुझाव माग गरिएको छ । सुझावहरू १५ दिनभित्र विभागको इमेल मा पठाउन सकिनेछ ।
सुझावका मुख्य क्षेत्रहरूमा हालको मापदण्डमा सुधार आवश्यक पक्ष, हरित आतिथ्य ‘ग्रीन हस्पिटालिटी’ का सूचकहरू, तथा होटलको भौतिक पूर्वाधार र सेवा गुणस्तरको वर्गीकरण समावेश गरिएको छ ।
काठमाडौं । काठमाडौंको पर्यटन प्रवर्द्धन तथा व्यावसायिक सहकार्यलाई थप सशक्त बनाउने उद्देश्यका साथ काठमाडौं साईडसिन प्रा.लि. र जिल्ला होटल व्यवसायी संघ काठमाडौं तथा एकता होटल तथा गेस्टहाउस व्यवसायी संघ, गौशाला काठमाडौंबीच व्यापारिक सम्झौता भएको छ । कार्यक्रम कमलादीस्थित स्काई टावरमा आयोजना गरिएको थियो ।
कार्यक्रममा काठमाडौं प्साईडसिन प्रा.लि.का डाइरेक्टर डा. एलेन बैलोचन तुलाधरले कम्पनीले पर्यटकहरूलाई काठमाडौं उपत्यकाका प्रमुख पर्यटकीय क्षेत्रहरूको भ्रमण अत्याधुनिक र सहज तरिकाले गराउने योजनाबारे विस्तृत जानकारी गराएका थिए । उनले कम्पनीको सेवा विस्तार र व्यवस्थित पर्यटन अनुभव निर्माणमा निजी क्षेत्रसँगको सहकार्य महत्वपूर्ण हुने बताए ।
सम्झौता जिल्ला होटल व्यवसायी संघ काठमाडौंका अध्यक्ष सुरेश बराल र सचिव अनिश बानियाको विशेष पहलमा सम्पन्न भएको हो । कार्यक्रममा संघका पदाधिकारी तथा सदस्यहरूको उपस्थिति थियो । होटल व्यवसायी महासंघका केन्द्रीय सदस्य ज्ञानु गजमिर, मोहन थेवे, लक्ष्मण भण्डारी, होटल तथा पर्यटन व्यवसायी संघ बागमती प्रदेशका अध्यक्ष दामोदर नेपाल, बालाजू होटल व्यवसायी संघका अध्यक्ष सूर्य बहादुर खाती, कलंकी होटल तथा गेष्ट हाउस एशोसिएसनका अध्यक्ष रमेश बराल तथा एकता होटल व्यवसायी संघका अध्यक्ष सरोज आलेलगायत होटल व्यवसायीहरूको उपस्थिति थियो ।
सम्झौताअनुसार काठमाडौंको पर्यटन प्रवर्द्धनका लागि एकीकृत मार्केटिङ, यातायात व्यवस्थापन तथा होटल सञ्जालमार्फत सहकार्य गर्ने सहमति गरिएको छ । विमानस्थलमा आगमन गर्ने पर्यटकहरूलाई लक्षित गरी सूचना, टिकट बिक्री र यातायात सेवा व्यवस्थापनमा सहकार्य गरिनेछ । संघले आफ्ना सदस्य होटलहरूलाई कम्पनीको आधिकारिक बिक्रेताका रूपमा आबद्ध गराउँदै होटलहरूमा प्रत्यक्ष प्रचार–प्रसार, ब्रोसर वितरण तथा ब्रान्डिङका कार्यक्रम सञ्चालन गर्नेछ ।
संघका वार्षिक कार्यक्रम, प्रकाशन तथा अन्य प्रवर्द्धनात्मक गतिविधिहरूमा काठमाडौं साईटसिइङलाई समावेश गरिनेछ भने दुवै पक्षबीच संयुक्त रूपमा पर्यटन प्रवर्द्धन तथा सामाजिक उत्तरदायित्वका कार्यक्रमहरू सञ्चालन गर्ने सहमति पनि गरिएको छ । सम्झौताको प्रभावकारी कार्यान्वयनका लागि नियमित समीक्षा बैठकहरू बस्ने व्यवस्था मिलाइएको छ ।
सहकार्यले काठमाडौंको पर्यटन क्षेत्रलाई थप व्यवस्थित, आकर्षक र प्रतिस्पर्धी बनाउने विश्वास लिइएको जिल्ला होटल व्यवसायी संघ काठमाडौंका महासचिव शैलेन्द्र विक्रम थापाले बताए ।
चरिकोट/होटल तथा पर्यटन व्यवसायी संघ नेपाल बागमती प्रदेशको छैठौँ साधारणसभा सम्पन्न भएको छ ।
सिन्धुपाल्चोक जिल्लाको सुन्दर पर्यटकीय नगरी सुकुटेमा यही माघ १८ र १९ मा उक्त साधारणसभा सम्पन्न भएको हो । सिन्धु सुकुटे पर्यटन व्यवसायी संघको सह आयोजनामा सम्पन्न उक्त साधारणसभाको उद्घाटन कार्यक्रमका प्रमुख अतिथि होटल व्यवसायी महासंघ नेपालका केन्द्रीय अध्यक्ष दिनेश कुमार चुकेले गर्नु भएको थियो । संघको आयोजनामा सम्पन्न उक्त साधारणसभामा प्रदेशभरिका जिल्ला संघहरुबाट उल्लेख्य मात्रामा प्रतिनिधि र पर्यवेक्षकहरुका उपस्थिति रहेको थियो ।
बागमती प्रदेश अन्तर्गतका १३ वटै जिल्लाबाट आएका होटल तथा पर्यटन व्यवसायीहरूको सहभागिता रहेको उक्त साधारणसभामा वर्तमान अवस्थामा सिंगो पर्यटन व्यवसायले नै भोगिरहनु परेका चुनौती, अवसर र सम्भावनाबारे गहन छलफल भएको थियो।
साधारणसभालाई सम्बोधन गर्दै अतिथि वक्ताहरूले नेपाल प्राकृतिक, साँस्कृतिक, ऐतिहासिक तथा भौगोलिक विविधताले भरिपूर्ण मुलुक भए पनि पर्यटन क्षेत्रको जुन ढंगले विकास हुनु पर्ने हो, त्यसरी हुन नसकेको उनीहरूले गुनासो गरेका छन् । नेपालको पर्यटन विकासले उचाइ चुम्न नसक्नुमा राज्यका सम्बन्धित निकायहरूको कमजोर व्यवस्थापन, नीतिगत अस्पष्टता, पूर्वाधार विकासको कमी, प्रशासनिक ढिलासुस्ती र सरकारले पर्यटन क्षेत्रको विकासलाइ महत्व नदिनु आदि मुख्य कारणले गर्दा नै पर्यटन उद्योगले गति लिन नसकेको उनीहरूले दाबी गरेका छन् ।
देशमा आइपर्ने हरेक खालका दैवी प्रकोप होस् या अन्य विभिन्न खालका विपदहरूबाट सबैभन्दा बढी प्रभावित क्षेत्र भने कै होटल तथा पर्यटन व्यवसाय हो भन्दै व्यवसायीहरूले वर्तमान अवस्थामा पनि त्यस प्रकारका समस्याहरूले निम्त्याएका असरहरूबाट यो क्षेत्र प्रभावित भइरहेको छ । वर्तमान विषम परिस्थितिमा पनि व्यवसायलाई जोगाइराख्न, राज्यलाई कर तिर्न, रोजगारी सिर्जना गर्न र सेवाको गुणस्तर कायम राख्न व्यवसायीहरू प्रतिबद्ध रहेको जनाइएको छ।
साधारणसभामा संघले पर्यटन क्षेत्रको विकासका लागि निजी क्षेत्रको भूमिकालाई अझ बढी सशक्त बनाउँदै राज्यका सरोकारवाला निकायहरुसँगको सहकार्यमा व्यवसायिक मर्यादा, गुणस्तर र सेवामा सुधार गर्दै अगाडि बढ्ने प्रतिवद्धता व्यक्त गरेको छ। साथै, युवा जनशक्तिलाई सीपमूलक तालिम मार्फत सक्षम बनाउँदै स्वदेश मै रोजगारीका अवसर सिर्जना गर्न संघले निरन्तर पहल गर्ने प्रतिवद्धता जनाएको छ। त्यसैगरी कार्यक्रमको अन्त्यमा बागमती प्रदेश अन्तर्गत रहेका सबै १३ वटै जिल्लाका होटल तथा पर्यटन व्यवसायीहरूको हक हित, प्रवर्द्धन र विकासका लागि संघ एकताबद्ध भएर अघि बढ्ने निर्णय गर्दै संघको छैठौँ साधारणसभा सम्पन्न भएको छ ।
